الثلاثاء 5 يوليو 2022
رئيس مجلس الإدارة
هبة صادق
رئيس التحرير
أحمد الطاهري
رئيس مجلس الإدارة
هبة الله صادق
رئيس التحرير
أحمد الطاهري

جوزك على ما تعوديه.. الامتحانات وسنينها

مع اقتراب نهاية العام الدراسى يبدأ الموسم الأخير للامتحانات، وطبعًا ده موسم تبدأ وتنتشر فيه الخناقات والمشاكل.. وده بيكون نتيجة لأن الأولاد مش عاوزين يذاكروا؛ وفاكرين إن بمجرد إنهم قعدوا على المكتب 10 دقايق أنهم خلصوا وراجعوا على المنهج، وده بيكون سبب أساسى للخناق ما بين الأم والأولاد؛ لأن طبعًا مفيش حد بيذاكر 10 دقايق ولا حتى نص ساعة؛ لأن ببساطة عقبال ما يدخل الأوضة ويطلع الأوراق والكتب ويبتدى يشوف حيعمل إيه بيكون فات تقريبًا ربع ساعة، ده طبعًا فى حالة إنه دخل على طول وساب الموبايل وقرر أنه يقعد بس علشان يذاكر.



المشكلة الحقيقية هى أنهم بيعتقدوا أنهم فاهمين كل حاجة وعارفينها، وده طبعًا أى كلام وبنكتشفه مع أول سؤال الأم تسأله للولد فى الدرس، ويبدأ النزاع التاريخى بين الأم والأولاد، وحينها يضطر الزوج لفض الاشتباك، لأنه بيكون اشتباك عنيف جدًا. 

موسم الامتحانات أكثر موسم بيكون فيه المشكلات الأسرية بشكل كبير لأن خناقات الأم مع أولادها بتأثر سلبًا على علاقتها بزوجها، اللى ممكن جدًا تتهمه بالتقصير لمجرد أنها فى خناقات المذاكرة مع الأولاد، اعذرها لأن فعلا المذاكرة معاهم بتكون صعبة جدًا مش علشان عدم فهمهم للمادة، أبدًا دى بتكون علشان هُمّا أصلا مش عاوزين يقعدوا يسمعوا الشرح، تلاقى الأم قاعدة بتعمل هى الملخصات وبتذاكر والولد قاعد مش معاها أساسًا.

فـيا عزيزى الزوج حاول أن تختفى فى هذا الموسم حرصًا عليك، وإذا اضطرتك الظروف للتواجد بالمنزل فى هذا الوقت الصعب، ساند زوجتك لأنها فعلا تعانى بشدة فى المذاكرة مع هذه الكائنات الفضائية.