الجمعة 29 مارس 2024
رئيس مجلس الإدارة
هبة صادق
رئيس التحرير
أحمد الطاهري
رئيس مجلس الإدارة
هبة الله صادق
رئيس التحرير
أحمد الطاهري

جوزك على ما تعوديه.. قومى البسى علشان خارجين

دى جملة تقشعر لها الأبدان، كما أنها جملة نادرة جدا لما يقرر الزوج أنه يقولها. وطبعا أول لما الزوجة تسمعها مش بتكون مصدقة نفسها من فرط السعادة، وتبتدى تفتش فى دولابها وتسمع أغنية الهضبة قدام مرايتها وبتكون فى حالة سعادة مش طبيعية،لحد لما الزوج يخلص لبس ويفضل مستنى مش كتير يعنى ١٠ دقايق، ويبتدى يتأفف وهى فى عالم تانى مع الهضبة قدام المراية، لحد لما تفوق على صوت جوزها وهو بيزعق ويقول دى مكنتش خروجة علشان أفضل مستنى حضرتك نص ساعة علشان ننزل، وإنك لو مجهزتيش فى ظرف ٣ دقايق يبقى خليكى فى البيت قدام المراية براحتك مع أغانيكى.



وتنزل الزوجة المسكينة جرى وهى تقريبا بتكمل لبسها على السلم وبتجرى وراه علشان تلحق الخروجة.

يا جماعة اللبس للخروجة والاستعداد لها بيختلف تماما ما بين الزوج والزوجة، وكمان طبيعة الخروجة ومكانها.

كل واحد بيجهز بطريقة مختلفة،لازم تعرفوا أن الستات بياخدوا وقت أطول حظا مقارنة بالرجل فى وقت الاستعداد للخروجة. وإن مش ذنبنا إنكم بتجهزوا فى ٥ دقايق وإحنا تقريبا بناخد من ساعة إلى ساعة وربع.. حسب طبيعة كل زوجة.

الحل الأمثل للجميع أن حضرتك متبتديش تلبس غير لما تلاقى الزوجة تقريبا خلصت وبتلبس الجزمة غير كده هيبقى إهدار للوقت وللصحة للطرفين.

وكمان علشان تستمتعوا بالخروجة من غير خناق، ومش مشكلتنا بقى لو حضرتك قررت تعمل فيها بطل وتلبس فى الأول ساعتها متلومش إلا نفسك. ويا رب أوعدنا جميعا بالجملة الحلوة دى.