كارت أحمر
منى رضوان
الكارت الأحمر أداة تحكيمية قانونية بتستخدم فى مباريات كرة القدم، بتترفع فى وش اللاعب كعلامة على طرده وبتلعب الفرقة ناقصة لاعب.
عادة الكارت الأحمر مبيترفعش على طول- بيكون فى قبله كارت أصفر وده معناه إنذار للاعب.
الحياة زى كرة القدم فى قوانينها- بندّى إنذار وكارت أصفر وبعدها كارت أحمر لطرد من أساء لنا أو خذلنا أو أخطأ وتجاوز فى حقنا أو للى معملش حاجة بالمَرّة.
الفرق الكبير بين كارت المباراة الأحمر وكارت الحياة الأحمر أن فى المباراة بيكون اللاعب ارتكب شىء معين أما فى الحياة فى ناس إما ترتكب أشياء كتيرة أو لا تفعل أى شىء بالمَرّة وتقف فى منطقة الخذلان ومبتعملش اللى متوقّع منها.
فى علامات استرشادية علمتها لنا الدنيا والمواقف تنبهنا أن وقت التخلى وإشهار الكارت الأحمر قرب:
- لمّا أفكارك مع أو عن الشخص دايمًا تكون للذكريات أكثر من الوقت الحاضر.
- لمّا مواقفهم معاك تسببلك ألم وزعل أكتر من الفرح والسعادة.
- لمّا يفضل كل شىء على حاله ويستمر النمط بتاع الشخص أو مواقفه مَهما لفت نظره.
- لمّا تبقى وحيد وانت معاه وتبقى غير مرئى ولا مسموع.
- لمّا يعيقك عن النمو والتقدم وإنك تبقى الشخص اللى انت عايز تكونه.
- لمّا يتبدد الأمل عندك فى أن الدنيا هتتحسن وتبقى مجرد أيام وبتقضيها بلا إشارات واضحة لنور فى آخر النفق.
- لمّا تمر أيامك وأنت شاعر بالإرهاق العاطفى والروحانى والجسدى ويقل شغفك.
- لمّا اللى قدّامك يبتدى يشكك فى معتقداتك وقيمك الأساسية ويطالبك إنك تضحى بيهم.
- لمّا تبطّل الاستمتاع بحاجات بسيطة كانت بتسعدك.
- لمّا الناس ومواقفهم يحطوك فى خانة الانتظار غير المحدد المدة.
لو لقيت نفسك بتقول أيوه لمعظم النقاط السابقة يبقى حان وقت التخلى وإنك تطلع كارت أحمر لكل من لا يضيف لك شيئا فى الحياة وبيستهلك طاقتك فقط.
الكارت الأحمر مش لازم نطلعه لناس مضايقانا فى حياتنا أو مورّينا الويل - أحيان كتير مبيبقاش كده، بيكون الوضع أن الشخص لم ولن يعطينا ما نريد منه كالحب والاهتمام أو أنه حاططنا فى خانة غير مناسبة لنا.
الكارت الأحمر فى العلاقات والناس ممكن يطلع علشان شخص ما معملش حاجة نرى أنها واجبة أو حتى محبناش زى ما إحنا بنحبه.
الكارت الأحمر فى الحياة كمان ممكن يكون بسبب أن الشخص بقى مجرد عائق يجب تجاوزه علشان نعدّى ونمشى لقدام ونتقدم ومنفضلش فى مكانّا واقفين محلك سر.
الكارت الأحمر مع الناس مش زى كارت الكورة- مش لازم نقول أسبابه ولا نعلنها للجمهور ونشهرها، ممكن نرفعه بينّا وبين نفسنا فى صمت.. وأخيرًا وقبل كل شىء الكارت الأحمر فى الحياة لا يعنى أننا بنكره الشخص أو بنلفظه- هو ممكن يكون بيطلع علشان إحنا ابتدينا نحب نفسنا.
