فلاحة مصرية

فلاحة مصرية قعدة مربعة على المسطبة ضحكتها بتهلل

وشجرة نخيل وجريد وبلح زغلول على الأرض بيضلل

ونازل على خدها حلقين دهب قشرة متدلدل

تمشى متغندرة.. وخلخلها بيرن ويجلجل

فلاحة مصرية.. مش محتاجة ببوية تدلل

فيها نغزتين على خدها ولبانة بتمطها وتتشملل

وبابتسامة أدب تخلى أجدعها دكر قدامها يتذلل

تشوف الميه من زورها وهى بتشرب من القلة وتعلل

يا هل ترا ملاك من السما ولا مرمر وبالميه متبلل

وبياض أيديها فى لت العجين لون الطحين بيتسلل

ووشها بدر فى تمامه والنجوم فى عيونها بتجلل

سبحان الخالق المعبود أميرة من غير تاج بتتكلل