جوزك على ما تعوديه.. أكلمك إمتى..؟
رغدة أبورجب
طبعًا ده سؤال يبان ساذج جدًا، بس الحقيقة أننا مش بنعرف نلاقى وقت نتكلم فيه مع الأزواج، الصبح بيبقى نازل بسرعة لأنه غالبًا بيكون متأخر على الشغل.. وطبعًا أول لمّا يرجع بيبقى تعبان ومش قادر يتكلم، وطبعًا بياكل وينام، وأول لمّا يصحى من النوم يكون بقى الوقت المناسب للكلام فايقوم قايل أنا مصدع وتَعبان ومش قادر على أى حوارات.
أيوه حضرتك لمّا أحب أتناقش معاك فى موضوع مهم أعمل إيه؟!
والعجيب فى الأمر أنهم بيقولوا إن الست نكدية وبتزعق ما هى حضرتك بتحاول بس تتكلم معاك لسّه ما اتخنقتش علشان الموضوع اللى بتتكلم فيه أصلاً.
ولمّا بتصر أنها تتكلم يقولوا عليها زنانة، طيب إيه العمل من وجهة نظركم مثلا؟! نبعت إيميل مثلاً ولاّ نطلب ميتنج ركوست؟ ولاّ نعمل إيه حضرتك!!.
ولمّا نزهق ونتكلم فى التليفون يا يقفل يا يرد ويقول معلش أنا فى الشغل حكلمك لمّا أخلص، وطبعًا ده مبيحصلش، فا النتيجة أن الزوجة ممكن تقعد يومين مثلاً أو ثلاثة بتدوّر على جوزها علشان تحكى له حاجة أو تاخد رأيه فى موضوع، لدرجة إنها ممكن تزهق أصلاً وتتصرّف هى من كتر ما هو مش متاح.
إحنا ممكن نعمل ميتينج أسبوعى نناقش فيه الموضوعات اللى بتخص البيت وندخلها على إكسل شيت ونوصل لحلول.
ولمّا حضرتك تحبى تسألى جوزك عن حاجة ممكن تبعتى له إيميل واستنى لما يرد عليكى. ومشوها فورمل أحسن بس مترجعوش تزعلوا.
