من بحرى وبنحبوه
منى رضوان
سبحان الله، كل أصحابى القريبين سواء من المَدرسة أو الجامعة أو الشغل وحتى جيرانى المقربين إسكندرانية بلا استثناء، ولذلك بقيت خبرة وأعرف أى سكندرى من أول5 ثوانى، بس مع كامل حبى لهم مش قادرة أسكت أكتر من كده.
أولًا كلنا عارفين إن اللهجة الإسكندرانى اتأثرت جامد بوجود الأجانب زى الطلاينة واليونانيين فيها، وهم اختاروا يعيشوا هناك لقرب جَوّها من جَوّ أوروپا، وطبعًا معروف أنها مَذهب النبلاء والملوك وأنها مدينة عريقة وتاريخية، بس مش هو ده اللى عايزة أتكلم فيه.
أنا موضوعى عن بعض الكلمات والمفاهيم والتصرفات بتاعة الإسكندرانية اللى بتدهشنى جدًا وهى مقصورة عليهم فقط وحاجة made in Alex جدًا.
ليه تقول كولّة القميص؟ ما تقول ياقة علشان نفهم.
وإيه مشروع دى، أول مرة حد قالها قدامى افتكرته بيهزر مش بيتكلم عن وسيلة مواصلات.
وليه جومة ومستيكة؟ يعنى خلاص الطليانى مقطع بعضه؟ طيب كنتوا خدوا من الطلاينة عمايل الپيتزا والمكرونة أفيد لكم ولنا.
وبعدين تلاقى الإسكندرانى من دول بقاله 30 سنة عايش فى القاهرة ولسّة بطاقته وترخيص عربيته فى مسقط رأسه- شىء مبهم عندى.
وكله كوم بقى والفتحة اللى بيحطوها على كل كلامهم، ولما تعلق يقولك دى العربى الفصحى كده!! ما ترسوا على بَر يا جماعة، أنتوا طلاينة وبتوع مستيكة وجومة ولاّ عربى فصيح وطَلعت ونَزلت بالفتحة؟ ركزوا كدة وحددوا هويّتكم وإحنا متقبلينكم فى كل الأحوال.
لمّا حد إسكندرانى يقولك أنا بردان تقوله سلامتك لأنه مش بيوصفلك حالته، ده بيقولك إن حرارته عالية وأنه عيان.
وبعدين إيه حكاية الإسكندرانية مع الطحينة؟ يحطوها على الكبدة تبقى كبدة إسكندرانى وعلى الفول يبقى فول إسكندرانى، فى إيه يا جماعة إنتوا بتدوا الأكل جنسية؟!
نيجى بقى لقصة «المشى على البحر حاجة تانية والذرة المشوى طعمه مختلف على الكورنيش بتاع إسكندرية عن أى كورنيش فيكى يا مصر واليود ، ريحة اليود بتحسّسنى بالأمان» اللى يقولك كده طبطب عليه، محتاج عطف جامد.
الجبنة الرومى اسمها جبنة تركى لأن أصلها تركى، الجبنة الفلمنك اسمها جبنة حمرا لأن لونها أحمر لحد كدة فى منطق، طيب ليه الطعمية اسمها فلافل ؟! رجاء التوضيح.
ليه الإسكندارنية لو لقوا نمر عربيات قاهرة يقولوا القهراوية زحموا البلد؟ ما أنتوا ماليين الشيخ زايد وأكتوبر وبدأتم النزح للتجمُّع وإحنا ساكتين وعندنا روح المواطنة عالية.
أهلى وأصحابى الإسكندرانية.. إنتوا حبايبى وعِشرة عُمْر، أرجوكم خليكم عاديين وبلاش الحاجات الإسكندرانى جدًا دى، إحنا يد واحدة وشعب واحد .
