خلص الكلام
مدحت نور الدين
خلص الكلام.. والناس نيام..
والجو ساكت.. وهس هس
وكعب عالى.. يضرب يلالى..
فى ليل أنانى.. يعمله حس
وضحكة فاجرة.. من غير إيقاع..
تقلبها سهرة.. وهز وسط
والكل يصحى.. محلاها سهرة..
ده رب صدفة.. ولا ألف بص
وعيون تفنجل.. وناس تهندم..
وكراسى قهوه.. وشيشة رص
وعود ومغنى.. وكلام له معنى..
والقافية تحكم.. يا عم هس
ولحم مشوى.. وفول مقلى..
وناس بتاكل.. وكلاب تبص
وبنات جميلة.. وحريم مخضرم..
أوزان تقيلة.. عاوزة تخس
وشباب يعاكس.. ورجالة تايهه..
وشحات أرارى.. يا عم حس
وعيال بتلعب.. فى الزهر تقرص..
وواحدة واقفه.. هناك تعس
وضاربها صارمة.. وعيونه وارمة..
ونفسين شاربهم وكلامه نص
وديك يأذن.. يا رب اغفر..
عبدك مغفل.. من ذنبه قص
خلص الكلام.. والناس نيام..
والجو ساكت.. وهس هس