يلّا ساحل؟
منى رضوان
تريند الساحل الطيب والساحل الشرير مكسّر الدنيا وخلاص الناس متقسّمة يا مع الطيبين يا مع الشريرين مع إن هم الاتنين فى الآخر بحر ورمل وشمس، ويا سلام لو وجه حَسن كمان يبقى المصيف اكتملت أركانه لسعادة مستحقة.
الساحل الشمالى مكان خلافى شوية، فى ناس بتحبه وناس مش أوى، اختلاف أذواق وهو طبيعى.
اللى مش طبيعى بقى بعض المشاهدات اللى بتحصل، أوثقها لكم كشاهدة عيان من قلب الحدث:
1 -الناس فى الساحل الشمالى المفروض رايحة تصيّف والله مش طالعة تعمل عرض أزياء، مش فاهمة بياخدوا معاهم خمسة وسبعين قطعة هدوم و17 جزمة و10 شنط ليه؟!
2 -الساحل عبارة عن شمس وبحر ونهار… سامع «نهار» فالناس اللى بتصحى الساعة 4 دى مش فاهماها بصراحة.
3 -كل واحد حُر يلبس اللى هو عايزه، بكينى، بوركينى، مايوه قطعة واحدة المهم كل واحد يركز فى نفسه الله يستركم.
4 -الدايت والساحل دونت ميكس، فكوها على نفسكم وعندكم طول السنة تمشوا فيه على الحمية الغذائية اللى انتوا عايزينها.
5 -الساحل يعنى سباق مع الزمن وأشهَر جملة هى «يلا علشان نلحق» أو «كده مش هنلحق». يلا نلحق نتغدى علشان نلحق البحر… هو البحر ماشى ولّا إيه مش فاهمة.
6 -اللبس مزاج وذوق، مش مهم لابس سينهات قد إيه قد ما مهم أنهم لايقين عليك وعلى بعض، فى ناس بتبقى لابسة سينهات بشكل عشوائى لدرجة أنهم بيبقوا فطوطة فى نفسهم.
7 -عادى جدًا الناس تاكل فول وطعمية فى الساحل، نظام مبفطرش غير پان كيكس pan cakes ده بينرفزنى، ما أنت بتاكل حلاوة بالقشطة فى القاهرة قلبت خواجة فى الساحل من إمتى؟!.
8 -الساحل الطيب هو كل ما قبل مارينا والساحل الشرير من بعد كدة، مراسى ودپلو وتلال وبلومار وهسيندا ولاڤيستا وغزالة دول كلهم فى الشرير بس ده ميمنعش خالص إننا كلنا أخوات، فعيش عيشة أهلك ومتعملش فيها الأيدى الناعمة.
9 -الحاجات فى الساحل اسمها بيتغير، البحيرة اسمها لاجون lagoon، حمّام السباحة اسمه پول pool، الملاك اسمهم أونرز owners والزوّار اسمهم ڤيزيتورز visitors، القهوة اسمها كوفى coffee وفى منها أميريكان أو فرينش أو كورتادو والكافيه اسمه الكلوب هاوس clubhouse والشبشب اسمه سليپر slipper والبونيه اسمه تيربون- معلش فوتوا وبعد الصيف ميخلص كله بيرجع طبيعى وبيضرب بتنجان مقلى فى عيش بلدى.
10 -فى علاقة غير مفهومة بين الناس اللى بتروح الساحل والتاتو… الساحل كله كاتب على قفاه أو ظهره جُمَل هيروغليفى.
بعد كل ما سبق من مُشاهدات أعتقد مفهوم ليه الساحل موضوع خلافى وليه له مريديه وله معارضيه وفى الآخر كل واحد ينام على الجَنب اللى يريحه ويصيّف مكان ما يصيّف المهم يتبسط.
يلّا ساحل؟
