الثلاثاء 26 أكتوبر 2021
رئيس مجلس الإدارة
أيمن فتحي توفيق
رئيس التحرير
أحمد الطاهري
رئيس مجلس الإدارة
أيمن فتحي توفيق
رئيس التحرير
أحمد الطاهري

جوزك على ماتعوديه .. اترك عربيتى من فضلك

عربيتى أملاها أسيبها أفضّيها مَحدش له دعوة، فيها بنزين مفيهاش دى حاجة ترجع لى.



يعنى لو أنت قرّرت إنك تركب عربيتى فا ده مش معناه إنك تشيل الحاجات اللى فى التابلوه اللى أنت شايفها مش مهمة، بس هى مهمة بالنسبة لى، يعنى الكريم وشبكة السباحة بتاعة الأولاد والمَضارب والكوَر وورق الشغل كل ده مهم ومش كراكيب، ها مش كراكيب. وإنك لو حتركبها يبقى تركبها زى ما هى.

وبالنسبة لموضوع البنزين، أيوه أنا بسيب عربيتى منورة والحمد لله ربنا بيسترها معايا وبوصَل بالسلامة، مَلكش فيه بقى، يعنى لما تركبها وتبقى مفيهاش بنزين الحل الأول إنك تسكت وتسوق وأنت ساكت أو تحط بنزين وأنت ساكت بردوا، وفى الحالتين أنت لازم تحط بنزين علشان تكمّل المشوار على خير، لكن إنك تزعّق بقى وتقول لى إنتى على طول بتسيبى العربية فاضية ومفيهاش بنزين ده بقى ميخصّكش يا حبيبى، اللى ستره ربه ميفضحوش عبده.

وبعدين عربيتى وأنا حُرّة فيها أحط فيها بنزين محطش أنا حُرة تمامًا. طالما مش بكلمك أقول لك الحقنى العربية وقفت منّى. (الحمد لله ربنا كريم وعالم بحالنا وعالم انتوا ممكن تعملوا فينا إيه).

 فـ إذا اطرّتك الظروف إنك تركب عربيتى تركبها زى ما هى دون أى تتشات أو افتكسات، لكن بقى نظام شيلى ده وحطى ده وروقى ده لا. من قواعد عربيتى العشرين إنها عبارة عن دولاب صغير؛ خصوصًا للأولاد، جاكت تلاقى مايوه تلاقى بُرنس سباحة موجود طبعًا، مَضارب، اسكوتر وما إلى ذلك من أدوات ترفيهية للأولاد من الصيف اللى فات بس برده ده مش معناه إنى حتخلى عنهم أبدًا.

اختصار موضوع العربية ده إنك تسوقها كده زى ما هى.

أو كفَى المؤمنين شر القتال ومحدّش يركب عربية مراته.