الثلاثاء 26 أكتوبر 2021
رئيس مجلس الإدارة
أيمن فتحي توفيق
رئيس التحرير
أحمد الطاهري
رئيس مجلس الإدارة
أيمن فتحي توفيق
رئيس التحرير
أحمد الطاهري

سكلانس وصاية

يؤمن الكثير من المُحبين بالمَثل اللى بيقول «الرجل يعشق بعينيه والست بودانها»، معتقدين أن قلب الست بيرقص من السعادة لمّا الراجل يلقى كلام الحب والغَزَل على مسامعها وساعتها بتحبه وتحط كل مشاعرها بين إيديه، أمّا الراجل فيتملكه سحر وجه وجمال الست اللى بيشوفه بعنيه.



من موقعى كست مش هقدر أعَلّق على الجزء الخاص بالرجالة وإيه موضوع الحب اللى بيبتدى من عينيهم وتكون هى البوابة لقلبهم فيحسّوا بمَشاعر حب ناحية الشخص التانى.

إنما موضوع أن مَدخل الست ودانها ممكن أدلو بدلوى فيه. أعتقد أن المقولة دى صحيحة بس ناقصة.

الكلام الحلو مما لا شك فيه له تأثير كبير فى إزاى الست بتشوف اللى قُدّامها علشان الكلمة لها قدرة كبيرة فى توصيل المَشاعر اللى البشر بتحس بيها وجُمَل الأفلام أكبر دليل على كده.

يعنى لمّا واحد يقول لواحدة «لقد قطعت محيطات من الزمن حتى أجدك» أو يقولها «لو عشتِ ووصلتِ لعامك المائة، أود أن أعيش لمائة عام إلا يوم، حتى لا أعيش بدونك أبدًا».

كلام جامد أوى يا جدعان ويزلزل الزلازيل، هو صحيح اتقال فى أفلام بس إحساسه قوى ووقعه شديد أول ما يخبط فى طبلة ودن أى ست.

تخيلوا كده يا ستات لو واحد قالكم كده، ممكن يغمن عليكوا.

بس وحُط خَط تحت كلمة «بَس» - هل الكلام الحلو المعسول كافى؟

يعنى لو حد كلامه حلو وبيعرف ينتقى مفرداته وأحاسيسه المصاحبة صادقة، هل ده كافى؟ فى رأيى طبعًا لأ.

مَهما كان الكلام صادق وقوى ومحسوس وواصل هو غير كافى لحب حد، هو ممكن يكون مقدمة أو بداية قوية بَس بلا مواقف أو أفعال تعززه يبقى مجرد سيناريو مكتوب أو جُمَل حوارية ساحرة ينفع نحفظها عن ظهر قلب بَس مش قصص نعيشها أو علشان أكون دقيقة مش قصص تعيش وتعمَّر فى الدنيا وتصمد.

المقياس الحقيقى للحب هو الأفعال والمواقف، الكلام الحلو فقط والمَشاعر المدلدقة اللى ممكن نصدّرها ونحطها فى علب ونعبّيها لها تاريخ صلاحية وفى وقت مبيبقاش لها تأثير على الشخص.

فى مَثل إنجليزى بيقول seeing is believing وده معناه بالبلدى إن الواحد بيصدّق اللى بيشوفه (مش اللى بيسمعه).

بَس علشان مبقاش ببخس الكلام الحلو حقه، لازم أكون حقّانية وأذكر أن فى كلام حلو أحب أسمعه حتى من غير حقائق وراه زى جملة «أنت خسيتى»، دى كانت جملة سحرية حتى لو مش حقيقة.

أمّا باقى الكلام الحلو اللى بيتقال أكنه أسطوانات رغى بلا مواقف أو أفعال تعززه ممكن تحطه فى فينو وتجيب حلاوة طحينية وشوية عسل وقشطة بلدى ومربى وتعملك واحد ساندوتش سكلانس تتعشى بيه.

صحيح الكلام فى المُطلق مبيأكلش عيش بَس فى حالات هيأكلك سكلانس وصاية.