الأحد 17 أكتوبر 2021
رئيس مجلس الإدارة
أيمن فتحي توفيق
رئيس التحرير
أحمد الطاهري
رئيس مجلس الإدارة
أيمن فتحي توفيق
رئيس التحرير
أحمد الطاهري

أميرة قاهرة المرض

فى كل مَرّة وفى كل مَقال هنتكلم فيها مع بعض عن لحظة سعادة، ممكن تكون اللحظة دى فيها سعادة لكل إللى حواليك، وتكون لحظة حزن ليك أنت شخصيّا، والعكس كمان ممكن يحصل، تكون لحظة سعادة ليك وتكون لحظة حُزن لكل إللى حواليك.. لحظات سعادة كتير هنتكلم عنها بتحصل لناس كتير، سواء لحظة سعادة بالنصر أو لحظة سعادة بوظيفة كان صعب قوى تتحقق، لحظة سعادة بمنصب مستحيل أو لحظة سعادة للشفاء من مرض صعب جدّا الشفاء منه.



لحظات بتعدى على الواحد وهو عنده مشاكل ولحظات تانيه بتعدى والمشاكل بتكون اختفت. 

لكن بطلة قصة النهارده أميرة حربى نقدر كده نشبهها بالكراسة الصفحة وصفحة، صفحة كلها تعب ومشاكل والصفحة التانيه هى التعافى من التعب والمشاكل أو ممكن كمان تشبه أميرة بالكراسة السطر وسطر، سطر كله عذاب وسطر كله فاضى بس متأثر بالعذاب ولكن بطله مقالتنا نقدر نقول كده هى بطلة بكل مقاييس البطولة هنا مش لأنها بتقدر تتعامل مع الآلام والتعب اللى بيحاصرها من كل جانب لكن البطولة هنا لأنها بتقابل كل ده بالرضا والضحكة.

الرضا اللى بنسمع عنه بس عمرنا ما شفناه.

خلينى أحكيلكم عن أميرة شويه «أميرة حربى» بنت مصرية عندها 19 سنة من محافظة المنيا.

بعد ولادتها بخمس أشهر اكتشف بابها ومامتها أن عندها مشاكل صحية وبدأوا معاها رحلة العلاج وأثناء رحلة العلاج تم تشخيص مرض أميرة بطرق غلط  والعلاج بطرق مختلفه وصولا إلى أنها مصابة بمشاكل فى الحبل الشوكى محتاجة تدخل جراحى، وفعلا تم التدخل الجراحى بعد الجراحة، لم تنجح الجراحة الأولى وحصلت جراحات تانية وبعدها مشاكل فى الكلى للأسف اتسببت فى عدم قدرة «أميرة» على المشى تانى، وأصبحت قبل ماتسحف بتستخدم كرسى متحرك ولكن علشان أهل أميرة وأخواتها كانو جنبها طول الوقت كانت أميرة من صغرها بتستقبل كل الصدمات بصدر رحب وبقناعة ورضا مفيش أحلى من كده.

ودخلت أميرة المدرسة وقدرت تعمل صداقات كتير بسبب ابتسامتها اللى مبتسبش وشها وبقى ليها صحاب كتير بيحبوها وبتحبهم.

أميرة عندها موهبة الرسم وبتحب الألوان وتحب ترسم بالألوان زاهية لما تشوف رسومات أميرة لازم تبتسم لأنها بتحب الحياة حتى فى لوحاتها وللحق بابا أميرة ومامتها وأخواتها التلاتة بيسعدوها ووجودهم حواليها طول الوقت بيخفف عنها كتير ومش بس الموهبة دى عند أميرة. 

أميرة بتعشق التمثيل وبتحب جدا أنها تمثل قدام المرايا ومن حظ أميرة الرائع أو من حظ مسلسل القضية 404 اللى كاتبه الكاتب رامز عباس وبيخرجه المخرج الشاب محمد الأنصارى أنهم بعد ما أعلنوا عن مسلسلهم وأنهم هيستعينوا بأولادنا ذوى القدرات الخاصة قدمت أميرة وطبعا بضحكة واحدة من وجهها البشوش أخذت أميرة قلوب كل اللى شفوها وأخدت طبعا الدور وما زال المسلسل فى مرحلة المونتاچ.

 من حظى الحلو أنى أعرف أميرة وبحب اتكلم معاها ومش بس كده أنا رقصت مع أميرة فى فرح ابنى المخرج محمد الأنصارى أيوه رقصت معاها بكرسيها المتحرك وضحكة أميرة وابتسامتها اللى كانت على وشها هفضل طول الوقت فاكر ضحكتها.

أميرة أنا بس حابب أقولك إنتى وماما وبابا وإخواتك نهاركم سعيد ويومكم بيضحك وأقول لكل اللى يقرأ المقالة دى نهاركم سعيد ويومكم بيضحك.