جوزك على ماتعوديه ..العيد فرحة

طبعًا إجازة العيد جميلة جدًا وطويلة وناس كتيرة قررت تسافر وتستمتع بها على شاطئ البحر. ده كان حال أغلب الأسر المصرية وقت إجازة العيد. لدرجة أن الطريق الصحراوية بقى أشبه بصلاح سالم.

تحس أنه وقت الهجرة للبحر سواء عشاق البحر الأبيض اللى بيتجهوا إلى الساحل الشمالى ومرسى مطروح والبعض الآخر اللى من عشاق البحر الأحمر. 

وفى قلة بسيطة قررت الاستمتاع بالإجازة هنا فى القاهرة وبيكون لها طعم تانى خاصة بشوارعها الفاضية اللى بتكون خالية من أى زحام مرورى لدرجة أنك ممكن تطلع الدائرى وتنزل منه عادى بعد نص ساعة. وده يعد حدثًا غريبًا وفريدًا من نوعه، لأنه فى الطبيعى أن البنى آدم بيسلم على أهله قبل ما يطلع الدائرى لأنه مش بيكون عارف حينزل منه إمتى.. فللقاهرة رونقها فى الأعياد. 

والناس اللى زى حالتنا اللى بيكونوا منورين القاهرة لظروف عمل أو ظروف أسرية أو ارتباط رياضى كبطولة مثلًا وتلاقى الكابتن قرر أن مفيش إجازة فى العيد وأننا حنتمرن وأن مفيش حد حياخد إجازة على غرار الفنان أحمد السقا فى فيلم الجزيرة «من النهارده مفيش حكومة أنا الحكومة... أنا الحكومة».

يا عم مصر كلها إجازة اشمعنا إحنا قالك مصر كلها معندهاش بطولة.

ما علينا مش موضوعنا حاليًا ولكن موضوعنا بقى أن مش معنى إننا مش حناخد إجازة أو إننا مش مسافرين إننا مانخدش إجازة من الأكل وما إلى ذلك من واجبات المنزل.

تلاقى أن العيد الكبير مرتبط عند الأزواج بالأكل واللمة وكل الحاجات اللى بتحتاج مجهود من الزوجة اللى طبعًا بتتمنى إنها تاخد إجازة زى مخاليق ربنا فى العيد، ولكن هيهات إجازة مين ده عيد اللحمة يعنى حمرى واسلقى واشوى وكل حاجة آخرها ياء.

عزيزى الزوج نرجو أن تكون استمتعت وأكلت وانبسطت فى عيد اللحمة ويا ريت تكون أكلت كمية تكفيك لفترة طويلة علشان نقفل المطبخ شوية. عزيزتى الزوجة المطحونة فى جميع المناسبات المجد كل المجد لك فى مقابل إسعاد كرش زوجك.

 وكل سنة وأنتى طيبة وإجازتك الجاية فى العيد الصغير إن شاء الله.