السندريلا 20 عاما على الرحيل: أميرة قلبى أنا

النهاردة أنا قررت أخرج من الكلام عن أولادنا ذوى القدرات الخاصة لأتكلم عن سيدة  ذوى قدرات خاصة كانت بتعرف تغنى وتمثل وتعرف تضحكنا  كمان وتعرف تبكينا؛ الفنانة سعاد حسنى تقريبًا عملت 91 فيلم سينمائي وعملت مسلسل واحد بس مسلسل  بميت مسلسل؛ مسلسل «هو وهى» مع الرائع أحمد زكى والعظيم صلاح چاهين وإخراج العظيم يحيى العلمى مع الاحتفاظ بالأستاذية لهم جميعا.

قبل الدخول فى تفاصيل إللى عايز أكتبه خلينى أفكركم باللى قالته سعاد حسنى أن «البنات البنات ألطف الكائنات إللى غنتها سنة 85 هى  وجرس الفسحة ضرب ضرب صوته كله طرب طرب» اللى بيتغنوا بيها فى المدارس الابتدائى فى معظم الحفلات المدرسية، ورغم أن سعاد حسنى عملت مسلسل واحد بس هيعيش مدى الزمان وندخل بقى على شوية معلومات بسيطة عن الراحلة سعاد حسنى إنتو عارفين أن سعاد حسنى ليها أربعة أفلام فى أفضل 100 فيلم فى السينما المصرية (الزوجة الثانية والاختيار وزوجتى والكلب والقاهرة 30) وكمان خدت لقب تانى أفضل ممثلة فى القرن العشرين. 

فكرت أكتب إيه أهم فيلم فى مسيرة الفنانة سعاد حسنى معرفتش أقرر بس اللى عرفت أقرره أنا بحب ليها إيه فى كل أعمالها بشكل شخصى غير مسلسل هى وهو طبعًا أو هو وهى لأن الأول هو ده سيد البيت الأولى هى ده الأتيكات (إبداع صلاح چاهين).

لقيت أنا بحب فيلم خلى بالك من زوزو وزوجتى والكلب وصغيرة على الحب والكرنك والزوجة الثانية والمشبوه وحب فى الزنزانة والاختيار والسفيرة عزيزة وطبعا غريب فى بيتى وأين عقلى وموعد على العشاء وإشاعة حب وحسن ونعيمة وشفيقة ومتولى وغروب وشروق وطبعا أفلام تانية كتير لو فضلت أكتب عن إيه اللى عجبنى بس هعدى الـ ٥٠ فيلم من أفلامها، بس اللى ممكن أقوله أن السندريلا وده اللقب اللى أُطلق على سعاد حسنى من بدايتها  وحتى وفاتها اشتغلت تقريبًا مع معظم أبطال السينما المصرية إللى ممكن ندكر منهم الأستاذ رشدى أباظة اللى اشتغلت معاه تقريبا 21 فيلم والأستاذ شكرى سرحان اللى عملت معاه حوالى 15 فيلم والأستاذ محمود عبدالعزيز 4 أفلام والفنانين أحمد زكى وعادل إمام وحسين فهمى تقريبًا كل واحد عملت معاه 5 أفلام التاريخ السينمائى هيفضل فاكر السندريلا والأجيال الجديدة كلهم هيفضلو يذكروا السندريلا إللى يوم واحد وعشرين من هذا الشهر يوافق مرور  عشرين سنة على وفاتها إللى مش هذكر عن وفاتها أى شيء، لأنى دائمًا أبدًا أحب أذكر كل ما هو إيجابى ومفرح وسعاد حسنى فرحتنا كتير ودايما عندها أغانى مشهورة رغم أنها مكنتش مغنية بس لازم أقولكم أن أول ظهور لسعاد حسنى كان وهى طفلة صغيرة جدًا فى الإذاعة وساعتها  غنت أغنية، من ضمن كلمات الأغنية:

( أنا سعاد أخت القمر 

بين العباد حسنى اشتهر)

ومن ساعتها وهى حبت الغنى والتمثيل وأصبحت سعاد حسنى 

معلومات صغيرة عن سعاد حسنى أنها كانت أهلاوية جدًا.

كانت بتحب القطط وكمان كانت بتحب تربيتها.

وأخيرًا هختم كلامى بشعر صلاح چاهين وقالته سعاد حسنى بصوتها وتحس من كلام القصيدة أنها تقصد نفسها. 

(من فضلكم ادخلو على اليوتيوب) واكتبو قصيدة صلاح چاهين بصوت سعاد حسنى اللى أنا هقفل كلامى فى المقالة دى بحزء صغير من القصيدة: 

وقف الشريط على وضع ثابت

دلوقتى نقدر نفحص المنظر

مفيش ولا تفصيلة غابت 

ده كل شيء بيقول وبيعبر

من غير كلام ولا صوت 

دلوقتى ضغط الموت على زر فى الملكوت

بخفة وبجبروت

وفى يوم أغبر 

وقف الشريط على وضع ثابت

ادخلوا اسمعوا صوت سعاد حسنى من كلمات الرائع صلاح چاهين واطلبو ليها الرحمة والمغفرة. 

وخلينى أنهى كلامى زى ما عودتكم نهاركم سعيد ويومكم بيضحك.