جوزك على ماتعوديه : ظل راجل
رغدة أبورجب
دايما كانوا يقولوا لنا إن ظل الراجل ولا ظل حيطة.. بس مع مرور الوقت اكتشفنا أن الكلام ده مش حقيقى، وأن الراجل لو مش بيراعى ربنا فى زوجته وأسرته يبقى بلاها أحسن والحيطة ساعتها أحسن وأحسن.
الراجل اللى المفروض إن الواحدة ترتبط بيه لابد أن يكون مسئولًا عنها، حنين عليها، باختصار قد المسئولية قادر على فتح بيت ورعاية أسرة.
وأعنى هنا بفتح البيت ليست المسئولية المادية فقط ولكن المسئولية الاجتماعية والنفسية لزوجته.
الراجل الحقيقى دائم التشجيع لزوجته حريص جدًا على كرامتها شغوف بكل تفاصيلها. يعاملها وكأنها ملكة قلبه.
ده الراجل اللى تتجوزيه غير كده خليكِ فى بيت أهلك معززة مكرمة بتاكلى وتشربى وعايشة حياتك.
الحياة الزوجية صعبة نظرًا للظروف المادية والاجتماعية الصعبة اللى أغلب الأسر بتمر بيها حتى من قبل كورونا، كل ده يهون أمام زوج مخلص كريم حنين مع زوجته يرى نجاحه فى نجاحها ويرى طموحه يتحقق بمجرد أن تحقق أهدافها، ده الراجل اللى تضحى علشان تبقى جنبه، ده الراجل اللى أهلينا زمان كانوا بيقولوا عليه مش مهم المهر ولا الشبكة إحنا بنشترى راجل.
وفعلا بيكون راجل ومش بس بيشيل بنتهم لا ده بيبقى مسؤل عن كل الأسرة.
الراجل الحقيقى هو اللى مش بيحب يزعل مراته أمام حد، ولا يجرحها بكلمة ممكن تضايقها أمام أى حد حتى ولو كان الحد ده والدته، الراجل اللى بجد هو اللى بيشوف أن كرامة زوجته من كرامته، هو ده الراجل اللى تتزوجيه لو مفيش يبقى الحيطة أحسن.
