"شهاب" مذيع قريبًا .. انتظروه
هشام سليمان
فى كل مَرّة وفى كل مَقال هنتكلم فيها مع بعض عن لحظة سعادة، ممكن تكون اللحظة دى فيها سعادة لكل إللى حواليك، وتكون لحظة حزن ليك أنت شخصيّا، والعكس كمان ممكن يحصل، تكون لحظة سعادة ليك وتكون لحظة حُزن لكل إللى حواليك.. لحظات سعادة كتير هنتكلم عنها بتحصل لناس كتير، سواء لحظة سعادة بالنصر أو لحظة سعادة بوظيفة كان صعب قوى تتحقق، لحظة سعادة بمنصب مستحيل أو لحظة سعادة للشفاء من مرض صعب جدّا الشفاء منه.
لحظات كتير بتعدى قدامنا ومش بنحس بيها بتعدى بسهولة ويمكن كمان مبنفتكرهاش.
بس لحظة تانية مهما عدى علينا الزمن بتفضل حاضرة قدام عنينا ومش هقول إننا مع الزمن بننساها.
لا بنفضل فاكرنها يمكن ننسى اللحظة اللى قبلها واللحظة اللى بعدها بس اللحظة دى نفسها لا.
مش ممكن ننساها وهتفضل اللحظة دى للى حصلت له هتفضل قدامو طول العمر.
رغم أنه ممكن يكون عدى بلحظات شبه كده.
وده اللى حصل للأب والأم أولياء أمر بطل مقالة النهاردة.
أقول لكم ليه؟
شهاب الدين عادل خميس هو بطل مقالة النهاردة هو وباباه ومامته وأخته.
كنت بقولكم إن فى لحظة مش هتتنسى من الذاكرة على الرغم أنها اتكررت بنفس الموقف بس الموقف ده مبيتنسيش.
لما الدكتور بلغ الأستاذ عادل أو اللواء عادل قائد فى مستشفى الحلمية العسكرى ودكتور العظام بابا شهاب وبلغ الأستاذة سعاد (خريجة آداب اجتماع) وربة منزل أن شهاب مصاب بمتلازمة داون نزل الخبر عليهم كالصاعقة.
بس علشان هما مؤمنين بقضاء ربنا تقبلوا الخبر بصدر رحب.
شهاب هو ترتيبه التالت بين إخواته يسبقه بنتين وآخر العنقود بعد شهاب كان ولد.
خلينى أعرفكم على إخوات شهاب.
سارة البكرية دكتورة أسنان.
والأخت التانية مريم مهندسة وبتفتح شركاتها الخاصة للديزاين.
أما بقى أحمد وهو أخو شهاب الصغير أو آخر العنقود زى ما بيقولوا فهو فنون جميلة قسم عمارة.
وطبعا ما ينفعش إخوات شهاب يكونوا مميزين كده وشهاب يكون مختلف يمكن شهاب مختلف فى الشكل بس فى الوراثة مكنش مختلف لأن زى ما انتم شايفين إخوات شهاب مميزين فى التعليم فاهتموا بشهاب من صغره ودخل شهاب مدرسة الأورمان العربية وحدائق المعادى القومية (تعليم عادى).
واتدرج شهاب فى السنوات التعليمية المختلفة لحد ما جاب 92 ٪ فى ثانوى ودخل كلية الآداب جامعة القاهرة قسم تاريخ.
هو حاليًا فى سنة تالتة، شهاب عنده أحلام كتير لنفسه ولكل اللى بيحبهم.
من ضمن أحلام شهاب إنه يكون مذيع.
ومن ضمن أحلامه كمان أنه يتخرج فى الجامعة ويفيد غيره بعلمه ويفيد نفسه.
غير بقى أن شهاب بطل رياضى محقق أكتر من 100 بطولة فى السباحة ورياضات تانية كتير.
أنا حظى حلو إنى أعرف شهاب شخصيًا ومن ضمن سعادتى أن شهاب لما بيشوفنى فى مكان بيكون مبسوط جدًا وشهاب بيحب يتكلم معايا ويحكى لى على اللى بيحلم بيه وبإذن الله يا شهاب أنت وعيلتك إللى بتقف جنبك وتدعمك حتحقق كل أحلامك.
وزى ما بأنهى المقالة كل مرة خلينى أقول لسارة ومريم نهاركم سعيد ويومكم بيضحك وليك يا شهاب أنت وأحمد برضه نهاركم سعيد ويومكم بيضحك.
وطبعًا بابا وماما نهارهم سعيد ويومهم بيضحك وكل اللى بيقرا المقال نهاره سعيد ويومه بيضحك.
