جوزك على ما تعوديه.. الستات والرادار

إحنا مقدرين دور الدولة فى الانضباط المرورى للحد من الحوادث، ده شيء مفهوم للجميع، لكن إحنا كستات بنعامل الرادار معاملة مختلفة عن باقى المجتمع ،الصراحة يعنى إننا مش بناخد بالنا نهائى منه، وغالبا ما بنتصور علشان مخالفين، سواء كانت علشان السرعة أو الموبايل، وده علشان بيكون واحدة من الصديقات على التليفون وعاوزه تحكى حاجة مهمة وطبعا مش عاوزه حد يسمعها فا لازم التليفون يكون على ودنى علشان أسمع هى عاوزه إيه مش كل العربية تسمع معايا، وًهنا بتتاخد الصورة الجميلة.

فالخلاصة إن صورنا بتنور فى المرور، بس صور مش طبيعية، بتكون عبارة عن واحدة منكوشة وبتصرخ فى العربية، ودى بتكون خناقة طبيعية عادية مع الولاد علشان متأخرين على المدرسة أو التمرين، أو فى خناقة بالرشاشات ورا بين أحباب الله علشان مين يقعد جنب الشباك ومين يقعد فى النص. 

المشكلة إن الصور اللى بتتصورها تشبه شخصية الفنان محمد هنيدى فى فيلم شركة المرعبين المحدودة. إحنا طبعا كستات مقدرين دور الردارات فى حياتنا وحنعمل له هيبة أكبر من كده خصوصا مع ارتفاع أسعار المخالفات، بس بلاش الصور بتاعتنا دى ربنا يستركم، إحنا عندنا أزواج مثبتنهم بصعوبة.